Markii uu jug isiiyey wuxuu yiri intaas ayaad noqonaysaa,
waan fuulay, waxaan naqday 53 iyo jajab, waxaa u marqaati kacay qoladii
horinaysay oo uu ku jiro kii markii hore isha ku dhiftay lacagtayda.
Waxaad moodaa in uu leeyahay "meeshaad ku sii
xasaynaysa ka soo bixi kuu waari maysee".
Lacagtii oo laalaaban oo aan mar hore si qaldan u soo bixiyey
sidii aad ku aragteen sheekada qaybteedii 2aad ayaan dhiibay, lacagtaas in aan
miisaan ku foolo iima qorshaysnayn.
Hadaan miisaan ku fuulayo waxaan soo maray dhawr Makiinadood
ay Rag ninkaan ka xoog badan la hurdoonayana laamiga dhiniciisa.
Markaan degay isla markiiba waxaa la qabtay mid kale asagoo
lacagtaydii kun iyo labo waxay aheed ma xusuustee gacanta ku haya, ayuu
billaabay wareegii iyo boodboodkii lacagtaydu ku dhimatay anna safkii ayaan
galay, waxaan daawasho u galay midka igu xiga oo xoogaa iga baallo waynaa,
igana Calool dheeraa.
Xamar meel sidaas loo dhooban yahay hadaad la soo gasho wax
maal aduunyo ah, waa in aad iska warqabtaa si joogto ah. Si aad u ilaashato
lacagta aad haysato hadba gacanta ayaa la saaraa meesha ay kuugu jirto korkana
waa laga jejebiyaa sidii nin Jirac tafta ugu jiro, hadba waa la jejebiyaa oo la
tuutuujiyaa meesha lacagtu kuugu jirto illaa aad ku dhawaato in aad meesheeda
ku tiriso illeen dadka luguma soo hor bixin karo e.
Calool dheerihii ayaa lugu dhiftay, maaqaan meelaan fiiriyay
intii odaga nafta ah u boodboodayey oo ku meereysanyey ninka iga uuska dheer,
waxaan qiyaasayey in ay san jugtu ugu dhici doonin sidii ay iigu dhacday maadaaba
uu Calool kuusnaa lagana yaabo in gacanta birtaa ee naf yare ka dalfato laakin
ma dhicin oo asagaaba iga bu’ macaanaa.
Odogii mixnadda ahaa ayaa tab uu yaqaano u la helay oo ugu
hubsaday xundhurtiisa jug uu la gariiray. Odogaas marka uu qofka ku rido
Gacanta wuxuu ku dadaalayaa in uu qofkaas gadaal u hinqiyo oo meesha uu taagan
yahay Cagaha uga qaado waana sida kaliya oo Run u ekaysiinaysa mujaamaladiisa
cabir qiyaaseed ka uu ku takhasusay ah, illeen qofkii oo aan Cagaha dhulka
looga qaadin intaas aad tahay lama oran karee. Waa naf ninku marka uu kugu soo
rida tunburyadana Cagaha Dhulka ku hayn maysid intaad doonto la ekaawe. Hadaad
sidaydoo kale Caato la galoolan tahay ama sida kii iga danbeeyay aad Baruur la
jacariirto kii ku tuuraa la yiraahdaa.
Marka uu rabo in uu cabirkiisa sheego qof aad u buuran ama
uu ka shakiqabo in uu sheegi waayo inta uu yahay wuxuu samaynayaa masraxiyad ka
badan inta uu samaynayo marka uu cabirayey aniga iyo wixii ila mid ah, waa ku
wareegayaa qofka asagoo sidiisii u boobboodaya, hadba garabka ayuu jagka
siinayaa, waa ku wareegayaa markaas uu ku wareegayo waa uu fiiriyanayaa waliba
Indhaha ayuu ku gubayaa. Wuxuu muujinayaa jugta iyo fiiradu labaduba in ay
sheegista cabirka qofka doorka qaadanayaan ee aysan jugta un kaliya ahayn waxa
lugu garanayo inta qofku yahay, xigtaa jugta yar ee uu hadba garabka uga
dhiganayo dadka buurbuuran iyo kuwa uu ka shakiyo ma sahlana door ayay
leeyihiin sida uu asagu nooga dhigayo.
Ninkaani qofna la hadlimaayo, kala sheekaysna maayo cilmigiisa
iyo farsamadiisa uu dadka cabirkooda ku sheegayo asagoon miisaan ka saarin,
kaliya qofka cusub ee yimaada waa laga yaabaa in uu kelmad yiraahdo laakiin cid
kale waqti iyo dadaal ku bixin maayo la hadalkeeda.
Markaan cabaar daawaday ayaan meesha uga tegay ninkii iyo
kuwii orinayay oo in ay soo bataan maahan aan yaraanayn. Dadkaan meesha joogaa
waxay ku joogaan shactaradiisa asaguna wuxuu ku dadaalayaa in aysan ka tegin,
hadba boodboodkiisa wuxuu ku soo darayaa farsamooyin kale siyaan looga daalin
oo aysan uga tegin meheredlaawayasha xiisaha u yeelaya masraxiyadda iyo
qiyaasta uu ku dilanayo lacagaha, hadday ka tagaan wax Dadka qalqaalinayaa ma
jiraan oo waxay uga dhigan yihiin testimonial (cadayn waxqabad), qofkii
yimaadaa wuxuu isleeyahay kuwaanba soo meesha ma marin adna baroowee markii
intaas laga tagana ayaka ayaaba qofka qalqaalinaya.
Ninkaan qofna ma fuuleen miisaankiisa hadduu iska hurdoon
lahaa inta meel fariisto oo shito Makarafoon ay ku duuban tahay “isla soco
hayska socone”.
Wuxu galay dadka iigu xusuusta badan intaan arkayey qof wax
gadaya;
☑ Wuxuu ahaa masrixiyadle
yaqaanna tabta oo socod siiyo adeega uu hayo,
☑ Jillaa fadhiya oo dhamaystiran
ayuu ahaa,
Si kooban ninkaan in ay dadku lacagta la agmaraan iska daaye
wuxuu awood u yeeshay in aysan ka tegin markuu lacagta ka qaato, oo ay xitaa ku
gacan siiyaan in uu dadka kale lacag ka disho oo ka gurto. Dadka asaga la midka
ah ee miisaanka laamiga dhiniciisa la fadhiyaa way hurdoonayaan markii cabaar
la joogo ayaa hal qof soo marayaa asaguna silac ayuu ku fuulayaa miisaankooda.
Waxaan is iri haddii uu jiri lahaa qof agtiisa miisaan ku haysta xitaa wuxuu ku
soo biiri lahaa kuwa orinaya ee miisaanka isaaray aniga.
Sirta ninkaani waxay tahay; wuxuu kala bartay muuqaalka
dadka iyo lafahooda markaas ayuu hakaas ka qiyaasayaa inta ay noqon karaan.
Wuxuu ku fashilmayaa qof iyo labo ayakana waa iska sii daynayaa illeen inta
kale ayay suurta gelinaysaa in ay fuulaan miisaanka. Hadduu dhihi lahaa dadka
dhan lacag ayaan ka qaadayaa ama aan sheego ama aan sheegiwaayo miisaankoodee,
waxaa imaan leheed in uusan qofna fuulin laakiin hadda dadku waxay tiigsanayaan
‘Hadii aan sheegiwaayo fasaxaad tihiin’.
Sheekada ninka kale waxaan ka dhigayaa qayb kale. Laftiisu
wuxuu ahaa nin aad u Caqli badan, Lambarro ayuu isticmaalayay ninkaanna waxay
wadaageen in uusan dadka la hadlayn iyo in ay u dhoobnaayeen dad badan oo
daawanayey farsamadiisa.
Anigu waxaan ku jiray dad farakutiris ah oo ka badbaaday in
uu lacag ka qaado, sideen uga badbaaday miisaan kana aan ku fuulay, waa noo
qormada danbe.
W/Q: Cabdifataax Cali Cabdalla "Imaam"
ConversionConversion EmoticonEmoticon